-- Article Text Block
Viðskipti snúast um traust. Það skýrir af hverju sum vörumerki eru gríðarlega verðmæt en önnur verðlaus.
Vörumerkin tjá loforð um tiltekin gæði og upplifun, sem byggir bæði á strategískri mörkun en einnig - sem er mikilvægara - á reynslu viðskiptavina yfir langan tíma. Þannig byggist upp traust.
Og öflug og þekkt vörumerki geta þannig haldið forskoti sínu lengi, ef þau halda rétt á spilunum. Áskorun ungra sprotafyrirtækja felst hins vegar í því að brjóta ísinn, komast inn á markaðinn og byrja að byggja upp traust markaðarins á eigin vörumerki.
Það verður alltaf verðugt verkefni - og mörgum mistekst.
En hvernig geta sprotafyrirtæki keppt við langa sögu og sterka ímynd þekktra vörumerkja og fyrirtækja á markaði?
Hér er fjallað um nokkrar leiðir sem nýsprottin fyrirtæki geta farið til að auka traust á sér með því að nýta möguleika eigin miðla, en markaðssetning og sala hefur hratt færst yfir á stafræna miðla undanfarin ár - eins og allir vita.