HS Orka - viðmótshönnun fæðist úr myndheimi

Oft eru vefir uppfærðir í tengslum við stóra endurmörkun eða þegar vörumerki fær nýtt útlit. En það færist líka aukana að nýir vefir gegni lykilhlutverki sem innviðir í stafrænni umbreytingu - óháð mörkun og ásýnd.

Í öllu falli þarf vörumerkjaásýnd að vera heildstæð gagnvart öllum stafrænum birtingarmiðlum og þar fer fremst vefurinn, sem er mikilvægasta birtingarmynd vörumerkisins. Þar liggur mikil ábyrgð - en líka tækifæri.

Þegar tekið er til við að hanna nýjan vef liggur fyrirliggjandi myndheimur og hönnunarstaðall (ef hann er fyrir hendi) til grundvallar. Þar er ekki aðeins um að ræða merkið sjálft, heldur einnig

• litir
• leturgerðir & ýmis íkon
• ljósmyndir & vídeóefni

Þessi myndheimur er því bæði leiðbeinandi og auðveldar oft hönnunarferlið, en getur um leið verið takmarkandi. Myndefnið býður þó yfirleitt einnig upp á tækifæri til frekari útfærslu í veflausnum.

Kjarni hvers vörumerkisins liggur í merkinu sjálfu (logo-inu). Merkið fangar og minnir á allt sem það er tákn fyrir, hvort sem það er virðisloforðið, orðspor á markaði, lykilvörur og þjónusta - eða myndheimur.

Vefurinn gefur tækifæri til að útfæra eiginleika í merki á ýmsan hátt.

Þegar vörumerki eru útfærð í vefhönnun skiptir mestu máli að skilja hvaða helstu hönnunareigindi eða element eru fyrir hendi í merkinu eða hönnunarstaðlinum. Slík element er upplagt að nýta til að styðja við notendaupplifun á vefnum - en ef þau flækjast fyrir notandanum er betra að sleppa þeim.

Hvað ef hönnunarstaðall er ekki fyrir hendi?

Stundum fáum við á Vettvangi í hendur verkefni þar sem lítil útlitsmörkun liggur fyrir, kannski aðeins logo. Oftar á þetta við um stofnanir og opinber fyrirtæki en getur einnig átt við stór og smá fyrirtæki - oft á B2B markaði - sem hafa stundað takmarkað markaðsstarf.

Vettvangur hefur nýlega hannað og þróað vef fyrir HS Orku, en hönnuður vefsins er Jón Kári Eldon.

Í tilfelli HS Orku var lítið að byggja á hvað varðar hönnun nema merki, litapallettu og stórt safn gæðamynda úr starfseminni.

Jón Kári sá þó hvernig mætti útfæra myndræn element úr merki og myndum af vatnslögnum HS Orku, sem fangar kjarnann í starfseminni.

Jón Kári hannaði kvik, grafísk element sem urðu gegnumgangandi leiðarstef í allri hönnun vefsins.

Grafíkin er táknræn fyrir orkustrauma sem liggja þvert í gegnum kerfi HS Orku og til viðskiptavina, en um leið bæta notendaupplifun með skemmtilegu flæði eftir því sem flett er áfram í gegnum efni vefsins.

Oft skortir á að hugsað sé fyrir myndefni þegar ráðist er í nýjan vef. Myndir skipta þó miklu máli fyrir notendaupplifun og geta haft mikil áhrif á ásýnd og ímynd vörumerkis.

Það þarf því að hugsa fyrir myndefni fyrir nýjan vef með góðum fyrirvara, auk þess sem góðar myndir geta verið innblástur fyrir hönnun vefsins, eins og í tilfelli HS Orku.

Það gefur ekki endilega auga leið að starfsemi fyrirtækis eins og HS Orku sé sérstaklega myndræn í eðli sínu, en eins og sjá má á meðfylgjandi myndum má finna þar mörg kraftmikil og skemmtileg myndræn mótíf.

Hönnunarvinna fyrir HS Orku snéri ekki aðeins að aðalvef fyrirtækisins. Auðlindagarðurinn er vörumerki og þjónustuframboð á vegum HS Orku sem fékk eigin hönnun og sérvef. Þar er höfðað til fyrirtækja, ekki síst erlendra, sem sækjast eftir sjálfbærri orku í framleiðslu sína.

Í því tilfelli hafði verið unnin góð undirbúningsvinna, bæði hvað varðar konsept, efni og útlit. Viðmót Auðlindagarðsins fékk þó einnig að láni element frá móðurvefnum, sem tengir merkin saman í heildrænt útlit. Auðlindagarðurinn er auk þess aðgengilegur í aðalvalmynd HS Orku.

Við erum virkilega stolt af samstarf okkar við HS Orku sem hefur verið til fyrirmyndar.  Lykill að vel heppnaðri lausn er alltaf þétt samvinna, stuttar boðleiðir og krítísk endurgjöf í hverju skrefi, sem var sannarlega tilfellið í þessu verkefni.

www.hsorka.is

Hans Júlíus Þórðarson